Háskóli Íslands

Boðsfyrirlesarar

Málvísindastofnun býður fræðimönnum til landsins, að jafnaði einum á ári, og greiðir kostnað við ferðina – fargjald, gistingu og dagpeninga. Miðað er við allt að 150 þús. kr. í fargjald, allt að 150 þús. kr. í gistingu og allt að 100 þús. kr. í dagpeninga, en heildar­kostnaður getur þó ekki farið yfir 350 þús. kr. Gert er ráð fyrir að fræðimaðurinn dveljist á landinu í 5-7 daga og flytji a.m.k. einn opinberan fyrirlestur. Einnig er gert ráð fyrir að hann taki þátt í fundum og semínörum með félögum í Málvísindastofnun.

Markmiðið með heimsókninni er að fá til landsins virtan fræðimann sem getur miðlað af þekkingu sinni og reynslu til félaga í Málvísindastofnun. Æskilegt er að heimsóknin tengist fræðasviði sem verið er að byggja upp eða rannsóknarverkefnum sem áform­að er að ráðast í, en einnig er hægt að bjóða framúrskarandi fræðimönnum sem sérstakur fengur er að fá til landsins. Yfirleitt er ekki er veittur styrkur til heimsókna sem ein­göngu nýtast verkefnum sem þegar eru í gangi og hafa fengið rannsóknarstyrk.

Félagar í Málvísindastofnun geta sótt um að fá að bjóða fræðimanni til landsins sam­kvæmt þessum reglum. Umsóknin skal berast stjórn Málvísindastofnunar fyrir 1. mars. Í henni þarf að nefna líklega eða æskilega tímasetningu heimsóknarinnar og áætla kostnað. Einnig þarf að fylgja áætlun um hvernig ætlunin er að nýta heimsóknina, bæði sem almenna kynningu í þágu félaga í Málvísindastofnun og í tengslum við verksvið og verkefni umsækjanda og samstarfsmanna hans.

Stjórn Málvísindastofnunar fjallar um umsóknirnar og ákveður fyrir 1. apríl hvaða heim­sókn verður styrkt hverju sinni. Við það mat er byggt á þeim atriðum sem nefnd eru í þessum reglum. Litið er sérstaklega til þess að heimsóknin nýtist félögum stofnunar­­innar sem best, og jafnframt er litið til þess hvort gesturinn höfði til fræðimanna á öðrum sviðum, svo og til almennings. Sé erfitt að gera upp á milli umsókna er heimilt að bjóða tveim gestum sama árið ef fjárhagur stofnunarinnar leyfir.

Þú ert að nota: brimir.rhi.hi.is