Eiríkur verðlaunaður fyrir árangur á sviði máltækni
Eiríkur Rögnvaldsson, prófessor emeritus við Íslensku- og menningardeild Háskóla Íslands, hlaut nýverið Steven Krauwer verðlaunin sem veitt eru fyrir árangur á sviði evrópska rannsóknainnviðaverkefnisins CLARIN. Meginmarkmið verkefnisins er að öll stafræn málföng (language resources) í Evrópu verði aðgengileg á einum stað til nota í rannsóknum í hug- og félagsvísindum og á sviði máltækni.
Eiríkur hefur gegnt lykilhlutverki í þróun máltækni hér á landi og hefur unnið ötullega að því að Ísland eigi aðild að alþjóðlegu þróunarstarfi á því sviði. Hann hefur tekið virkan þátt í evrópskum verkefnum á sviði máltækni frá árinu 1998 og leitt vinnu við verkáætlanir um íslenska máltækni og unnið að fjölda rannsóknarverkefna á þessu sviði, þ.á m. íslensku risamálheildinni sem hefur nýst við fjölda rannsókna í máltækni og málfræði. Eiríkur er einn af stofnendum Almannaróms, sjálfseignarstofnunar sem hefur það hlutverk að tryggja að íslensk tunga sé notuð í tækniheiminum og framfylgja Máltækniáætlun stjórnvalda. Hann var fyrsti fulltrúi Íslands í CLARIN-verkefninu og gegndi því starfi til 2021.
Steven Krauwer verðlaunin eru kennd við fyrsta framkvæmdastjóra CLARIN-verkefnisins og þau eru bæði veitt efnilegum vísindamönnum og þeim sem hafa náð markverðum árangri í starfi.
Á Vísindavefnum segir að með máltækni sé átti við hvers kyns samvinnu tungumáls og tölvutækni sem hefur einhvern hagnýtan tilgang; beinist að því að hanna eða útbúa einhvern hugbúnað eða tæki sem nýtist fólki í starfi eða leik.
Sjá nánar um rannsóknir og starfsferil Eiríks Rögnvaldssonar.
![](/sites/malvis.hi.is/files/styles/original_small/public/2023-10/sk_rognvaldssonbreytt2.png?itok=JLHJRddY 479w, /sites/malvis.hi.is/files/styles/original_medium/public/2023-10/sk_rognvaldssonbreytt2.png?itok=eOS9r5KO 480w, /sites/malvis.hi.is/files/styles/original_large/public/2023-10/sk_rognvaldssonbreytt2.png?itok=OcQdrs0W 768w, /sites/malvis.hi.is/files/styles/original_extra_large/public/2023-10/sk_rognvaldssonbreytt2.png?itok=35ItG3HM 1024w, /sites/malvis.hi.is/files/styles/original_full/public/2023-10/sk_rognvaldssonbreytt2.png?itok=xFAgCNAZ 1440w)